Kroashent Kerne - Ti ar Brug

Ar raktres degemer

Abaoe miz Gwengolo 2024 e vez degemeret diabarzhidi Skolaj Diwan Jakez Riou (80 skolajiad degemeret bep Lun ha Yaou da noz en amzer skol), hag ivez un nebeud annezerien pad e lojeizoù hiniennel ( labourerien yaouank, stajidi a bep eil, studierien). Fellout a ra deomp diorren an obererezh degemer. Kement-se a vo graet tamm-ha-tamm diouzh nerzh an dud a youl vat ha diouzh an arc’hant da gaout evit nevesaat ar savadur.

An danvez raktresoù rakwelet

• Ur vagouri vrezhonek
• Ul lec’h diellerezh evit ar c’hevredigezhioù sevenadurel breizhek
• Ur greizenn stummañ war ar brezhoneg evit an dud gour
• Stajoù evit familhoù e brezhoneg...

Kalz a lec’hioù a zo e Ti ar Brug evit degemer obererezhioù kevredigezhel. Gellout a reomp kinnig lec’hioù pad (burevioù, dastumlec’hioù) pe lec’hioù da implijout diouzh an ezhomm (salioù emvod, sal-debriñ, kambroù...).

Prizioù da skouer :

• Burevioù 22 m2 (gant sal-dour e-barzh ha tu da implijout ur gegin/sal emvod voutin) : etre 275 € ha 340 € ar miz.
• Lec’h dastum (goullo) : etre 9 € ha 12 € /miz.
• Sal-debriñ : etre 200 € ha 250 € an devezh pe ar 24 eurvezh.

Herberc’hiañ
Evit poent ez eus dija un hunva a 94 gwele e 27 kambr, enno etre ur gwele ha pemp gwele.
E pep kambr ez eus ur sal dour prevez gant ur gwalc’heris, privezioù hag ul logell-vreliñsat. Gellout a reer feurmiñ ar c’hambroù-se en dibennoù-sizhun hag e-kerzh ar vakañsoù-skol (teurel evezh, en amzer skol ne c’heller herberc’hiañ nemet e 90 gwele dasparzhet e 23 c’hambr).

A-hend-all e labour tud a youl vat Kroashent Kerne da nevesaat studioioù ha kambroù (3 studio hag 1 gambr a zo annezet dija). Pelloc’h e vo 9 studio a 32 m2 ha 9 c’hambr 22 m2 (sal-dour vras e-barzh), evit lojañ tud prevez. Al lec’h herberc’hiañ-mañ a zo da gentañ penn evit lojañ studierien, tud e stummadur, labourerien yaouank. En hañv e c’hellfe al lojeizioù vak bezañ kinniget da labourerien diouzh ar c’houlz-bloaz.

Gellout a ra an dud dalc’het en o c’heflusk diraez ar c’hambroù. Feurmerien ar c’hambroù a c’hell implijout ur gegin vihan voutin, enni ur yenerez, ur forn, un dar, ur mekanik kafe ha listri.
Evit gwellaat an aozioù degemer e fell deomp staliañ ur roteler boutin dirak Ti ar Brug ha kaout war grenn dermen ur c’harrdi evit marc’hoù-houarn hag un ti-kouez / ti-sec’hañ a-stroll.

Aveadurioù
Evit ar predoù : ur sal-debriñ sklaer-tre a 100 plas, 100 re loaioù, kontilli, fourchetez/asiedoù/gwer/bolennoù, dar, yenerez, pladenn war-ruilh, skaoterez listri en isdouar (mont gant ar saverez).

Pelloc’h hon eus c’hoant da adstaliañ ar gegin en isdouar, evit ma c’hello ar strolladoù degemeret keginañ eno.

Evit an emvodoù : sal sklaer-tre a 100 azezenn, ur veranda evit ar blijadur (15 den), ur saloñs c’hoarioù (15 den). Gellout a reer ober tizanoù hag implijout ar mekanik kafe.

Evit poent n’eo ket kevreet Ti ar Brug ouzh Internet met labourat a reomp evit ma vo. Resevet mat e vez ar 4G hag ar 5G er savadur memestra.